ယခု တင်ပြမည့် ဆောင်းပါးသည် ရွေးကောက်ပွဲဝင်မည့် ပါတီများ၏ အတွင်းစည်း အပြင်စည်းများ၊ ၀ှက်ဖဲများ၊ ၎င်းတို့၏ ဘေးကျပ်နံကျပ် အနေအထားများ၊ ပြည်တွင်းစာမျက်နှာထက် တင်ပြခွင့်မရသည့် အခြေအနေများကို ပြည်တွင်းမီဒီယာရှုထောင့်မှ တင်ပြရေးသားထားခြင်းဖြစ်သည်။ ထို့အတွက် ယခုစာစုကို ဖတ်ရှုပြီးက ပါတီတို့မှ ရွေးကောက်ပွဲ ၀င်သင့် မသင့်၊ ပြည်သူတို့မှ ဆန္ဒမဲ ပေးသင့် မသင့် စဉ်းစားဆုံးဖြတ်နိုင်စေရန် ရည်ရွယ်ခြင်းဖြစ်သည်။
ယနေ့ ပြည်သူနှင့် ရွေးကောက်ပွဲ
ပြည်သူတို့သည် မဆလ၊ န၀တ၊ နအဖ စစ်အာဏာရှင် လက်ထက်တလျှောက် ဖြတ်သန်းလာသူတွေ ဖြစ်သောကြောင့် ၎င်းတို့၏ စိတ်ဓာတ်သည် သင်းသတ်ခံထားရသလို အရာရာ ဦးထောင်ဖို့ ခဲယဉ်းနေပေသည်။ အုတ်နံရံကို ခေါင်းထိုးတိုက်သူသာ အမှားဟု ယူဆထားသူ လူတန်းစားက အမှန်တရား၏ ဘက်တော်သားတို့ထက် ဆကဲများနေသည်။
ဘယ်သူတက်တက် တို့အစိုးရ ဟူသော ရေပေါ်ဆီ လူတန်းစားတို့ ရှိနေသလို နိုင်ငံရေးနှင့် ထောင်ကို တွဲလျက် မြင်နေသူတို့သည်လည်း ဒုနှင့် ဒေး။ ကမ္ဘာ့ဖလားဘောလုံးပွဲလောက် ရွေးကောက်ပွဲကို စိတ်မ၀င်စား။ ဆန်အိုးထဲ ဆန်ရှိနေဖို့သာ အရေးကြီးသည်ဟု အများစု ယူဆထားကြသည်။ နင်းပြားဘ၀ စိတ်လျှော့မာန်ပျောက် အသိနောက်ကျနေသူတွေ ယနေ့ကာလမှာ လက်ညှိုးထိုးမလွဲ။
အမှန်တကယ်မူ ရွေးကောက်ပွဲအပေါ် ပြည်သူတို့စိတ်ဝင်စားမှု နည်းရခြင်းသည် ပြည်သူတို့၏ အပြစ်မဟုတ်။ အုပ်ချုပ်သူ လူတန်းစား၏ အဓမ္မမှုများအောက်တွင် ဓမ္မသည် သိမ်ငယ်နေရခြင်းဖြစ်သည်ဟု နိုင်ငံရေးအကဲဖြတ်တို့က သုံးသပ်သည်။
မည်သူကို မဲပေးရမည်နည်း
၂၀၁၀ နိုဝင်ဘာ (၇) ရက် ရွေးကောက်ပွဲမတိုင်မီ တာအစားဆုံး မေးခွန်းဖြစ်သည်။ ရွေးကောက်ပွဲဝင်မည့် ပါတီတို့သည် ၎င်းတို့၏ နိုင်ငံရေးမူဝါဒ၊ စီးပွားရေးမူဝါဒ၊ ရှေ့လုပ်ငန်းစဉ်တွေကို ၎င်းတို့၏ နိုင်ငံရေးအစဉ်အလာတို့နှင့် ပူးတွဲကာ ပြည်သူကို ချပြနေသည်။ ပြည်တွင်းမီဒီယာများ အကူအညီဖြင့် ပြည်သူနှင့် မိတ်ဆက်နေသည်။အကန့်အသတ်များစွာနှင့် ဖော်ပြနေရသည့် ပြည်တွင်းမီဒီယာများသည်လည်း လူထုအတွင်း နိုင်ငံရေးအသိတွေ သဘောတရားတွေကို ပျံ့နှံ့စိမ့်ဝင်လာအောင် စွမ်းဆောင်နိုင်ပါ၏လော မေးခွန်းထုတ်စရာ ရှိလာသည်။
ရွေးကောက်ပွဲအပေါ် စိတ်ဝင်စားမှု၊ မည်သူ့ကို မည်သည့်ပါတီကို ရွေးချယ်သင့်သလဲ ဆုံးဖြတ်နိုင်ရေး စစ်တမ်းကောက်နေသည့် 7 Days ဂျာနယ် အယ်ဒီတာတဦးကမူ “ပြည်သူ၏ စိတ်ဝင်စားမှု အားရစရာမရှိ” ဟု မှတ်ချက်ပြုသည်။
ရွေးကောက်ပွဲဝင်မည့် ပါတီများနှင့် ပြည်တွင်းမီဒီယာများ
လူထု၏ ရွေးချယ်ဆုံးဖြတ်မှု မှန်ကန်စေရေး၊ အသစ်ပေါ်ထွန်းလာမည့် လွှတ်တော် (၃) ရပ်တွင် လူမှန်နေရာမှန် ရွေးချယ်နိုင်ဖို့ မီဒီယာကဏ္ဍ များစွာအရေးပါနေသည်။ စာမျက်နှာထက် ဖော်ပြခွင့်ရသည့် အခြေအနေ၏ နောက်ကွယ်မှ အသံများ၊ ပါတီတို့နှင့် သတင်းထောက်တို့၏ အတွင်းစည်းကိစ္စများသည် မည်သည့်ပါတီကို မဲပေးသင့်သလဲဆိုသည့် အဖြေ ဖြစ်နိုင်သည်ဟု ဂျာနယ်သတင်းထောက်တို့က ယူဆနေကြသည်။
ရွေးကောက်ပွဲဝင်မည့် အမတ်လောင်းများနှင့် ပြည်တွင်းမီဒီယာတို့၏ ထဲထဲဝင်ဝင် ပတ်သက်ခဲ့သမျှကို အလျဉ်းသင့်သမျှ ဖော်ပြပါမည်။
အမျိုးသားဒီမိုကရေစီအင်အားစုပါတီ (NDF)
“လွှတ်တော်ထဲမှာ နိုင်ငံရေးယုံကြည်မှုတွေ တည်ဆောက်နိုင်ရင် အမျိုးသားရင်ကြားစေ့ရေးကို ဖော်ဆောင်ဖို့ လမ်းစပေါ်လာမှာပါ။ လွှတ်တော်ထဲမှာ အခြေခံဥပဒေ ပြင်ဆင်ရေးက စရပါလိမ့်မယ်” ဟု ဆိုသော ဒေါက်တာသန်းငြိမ်း၊ “အစိုးရအဖွဲ့ကို ထိန်းချုပ်နိုင်တဲ့ ဥပဒေပြုအာဏာကို ပြည်သူ့ကိုယ်စားလှယ်တွေ ပိုင်ဆိုင်ခွင့်ရနေလျက်နှင့် …” ဟုဆိုသော ဦးခင်မောင်ဆွေတို့သည် ပြည်တွင်းမီဒီယာများနှင့် တွေ့ခဲ့ကြပါသည်။
မီဒီယာများသည် ၎င်းတို့အာဘော်များ ပါဝင်ရေးသားဖော်ပြမိမည်ကို မလိုလား၍ အသံဖမ်းစက် ကိုယ်စီသုံးကြပါသည်။ NDF ၏ နိုင်ငံရေးအယူအဆတွေကို သည်၊ ၏ မရွေး ဖော်ပြခဲ့ကြပါသည်။ သို့သော် စာမျက်နှာထက် ဖော်ပြပြီးခါမှ NDF အမတ်လောင်းများက ဤစကားစုများ ၎င်းတို့မသုံးနှုန်းကြောင်း၊ ၎င်းတို့ပါတီ၏မူဝါဒများ မဟုတ်ကြောင်း ဘူးကွယ်လာသည်။ လူကိုယ်တိုင် (သို့မဟုတ်) တယ်လီဖုန်းဖြင့် ဂျာနယ်ခန်းများသို့ အရေးဆိုလာကြသည်။
အဆိုပါဖြစ်စဉ်မျိုး ဂျာနယ်အတော်များများ ကြုံတွေ့ဖန်များလာသောအခါ ကိုယ့်စကားကိုယ် တာဝန်မယူရဲသော NDF ၏ နိုင်ငံရေးခံယူချက်များအပေါ် မီဒီယာများက သံသယ၀င်လာကြသည်။ မီဒီယာကို လှည့်စားဖို့ ၀န်မလေးသော ပါတီသည် လူထုကို ပေါ့ပေါ့သာသာ လှည့်စားပေလိမ့်မည်ဟု ခံယူလာကြသည်။ ပြည်သူတို့၏ လက်တွေ့ဘ၀ကို မီးမောင်းထိုးပြဖို့ ၀န်လေးမည့်ပါတီအဖြစ် မီဒီယာတို့ သတ်မှတ်လာသည်။
၈၈ မျိုးဆက်ကျောင်းသားလူငယ်များ (ပြည်ထောင်စုမြန်မာနိုင်ငံ)
NLD ပါတီအပေါ် ကျဉ်းမြောင်းသောအမြင်နှင့် ပြစ်တင်ဝေဖန်ကာ နိုင်ငံရေးဖျာတချပ် ၀င်ခင်းသော နအဖကိုယ်ပွားပါတီ၊ ကျောင်းသားထု အမည်တပ်ကာ လက်တို့ခေါင်းညိတ် နိုင်ငံရေးဖော်လံဖားပါတီဟု မီဒီယာတို့က အမည်တပ်သည်။
၈၈ မျိုးဆက်ကျောင်းသားလူငယ်များ (ပြည်ထောင်စုမြန်မာနိုင်ငံ) ပါတီ၏ နိုင်ငံရေးရပ်တည်ချက်များကို သတင်းထောက်မှ မေးမြန်းလေသော် ဥက္ကဋ္ဌ ဦးရဲထွန်း၏ အဖြေအပေါ် ဗဟိုအလုပ်အမှုဆောင် ဦးသန်းဦးမှ ၀င်ရောက်ကန့်ကွက်ဟန့်တားခြင်း၊ တဦး ဖြေနေသည်ကို အခြားတဦးမှ မဟုတ်ပါဟု ထ၍ ငြင်းဆိုခြင်း၊ သတင်းထောက်ရှေ့ထား၍ ဥက္ကဋ္ဌဖြစ်သူနှင့် ဒု-ဥက္ကဋ္ဌ အဖြေတခုအပေါ် အချင်းများနေခြင်း … စသည့် နိုင်ငံရေးဝမ်းစာနည်းသည့် အခြေအနေမျိုး တွေ့ခဲ့ရသည်ဟု သတင်းထောက်တဦးက ဆိုသည်။
မြန်မာနိုင်ငံလုံးဆိုင်ရာ အမျိုးသားနိုင်ငံရေးအဖွဲ့ချုပ်
အခြားပါတီ၏ လစ်ဟာအားနည်းချက်များကို ဖော်ကောင်လုပ်ကာ မိမိပါတီအား ဇောင်းတင်သော နိုင်ငံရေးစားဖား၊ နိုင်ငံရေးဖော်ကောင် ဦးအေးလွင် (ဥက္ကဋ္ဌ) ၏ ပါတီဖြစ်သည်။ ၎င်းပါတီသည် ရုံးချုပ်တည်ရှိရာ နေအိမ်၌ ညနေခင်းတိုင်း တို့အရေး ကြွေးကြော်သံ အော်ခွင့်ရှိသော ပါတီဖြစ်သည်။
ပါတီရုံးချုပ် စတင်ဖွင့်လှစ်သည့် အခမ်းအနား၌ လိုင်စင်မဲ့ကား (၅) စီးခန့် လူအပြည့်တင်ကာ တို့အရေး အော်ဟစ်သံများဖြင့် ရန်ကုန်မြို့အနှံ့ လှည့်လည်ခဲ့သော နအဖ ကျောထောက်နောက်ခံပါတီဟု မီဒီယာတို့ သတ်မှတ်ထားကြသည်။
ဘုရင့်နောင် ကုန်စည်ကားဝင်းအတွင်း တကျပ်တပြားမှ အစ ပါတီရန်ပုံငွေ ၀င်ရောက်အလှူခံခြင်း၊ မြောက်ဥက္ကလာဒေသ အာဏာပိုင်များသို့ အကြောင်းမကြားဘဲ ဈေးများအတွင်း လှည့်လည် အလှူခံနေခြင်းကြောင့် မြောက်ဥက္ကလာ စည်ပင်မှ တရားစွဲဆိုခဲ့သော ပါတီအဖြစ် ပြည်သူမှ မျက်စိစပါးမွေးစူးနေသော ပါတီဖြစ်သည်။
အပိုင်း (ခ)
မြန်မာဒီမိုကရေစီကွန်ဂရက်ပါတီ
ဥက္ကဋ္ဌ ဦးကောင်းမြင့်ထွဋ် အပါအ၀င် အဖွဲ့ဝင် (၅) ဦးအား တွေ့ဆုံမေးမြန်းခဲ့သည့် သတင်းထောက်တဦးက “ဦးကောင်းမြင့်ထွဋ်ဟာ (၁၃) နှစ်သားမှာ နိုင်ငံရေးမှုနဲ့ ထောင်ကျခဲ့တယ်လို့ သူ့နှုတ်က ပြောတယ်။ ကျနော် သေချာအောင် ထပ်မေးတယ်။ သူက ဟုတ်တယ်ချည်း ဖြေတယ်။ အသက်မပြည့်သေးသူကို ခုလို ထောင်ချလို့ ရပါသလားဆိုတဲ့ မေးခွန်းကျ သူ မဖြေဘူး။ ရှောင်ထွက်သွားတယ်။ ဒီတော့ နိုင်ငံရေးစံကို ထောင်ကျဖူးခြင်းနဲ့ တိုင်းတာလို့ ရပါ့မလား။ တလွဲ ဆံပင်ကောင်းနေတဲ့ သူ့အဖြေကြောင့် သူ့ကို နိုင်ငံရေးအာဝါလားလို့ မီဒီယာအနေနဲ့ သတ်မှတ်တယ်” ဟု ဝေဖန်သွားသည်။
ပါတီအတွင်းရေးမှူး ဝေမှူးသွင်ကိုမူ အရူးစာရေးဆရာဟု မီဒီယာက သိထားသည်။ စာရေးဆရာ သစ္စာနီကမူ “ဘာကိုမှ အလေးအနက်မထားသူ” ဟု အရူးဘုံမြှောက်သည်။ ဂျင်းဘောင်းဘီနှင့် နားကပ် အမြဲဝတ်ဆင်ထားလေ့ရှိသော စာရေးဆရာသည် ပြည်သူ့ကိုယ်စားပြု အမတ်ဖြစ်သွားပါက မြန်မာပြည် ကောင်းစားဦးမည်ဟု မီဒီယာများက ပြက်ရယ်ပြုသည်။
ခေတ်သစ်ပြည်သူ့ပါတီ
ထွန်းအောင်ကျော် (MSR) ဆိုသူသည် ၁၉၉၈ ခုနှစ် မေလ တတိယပတ်က သမ္မတရာထူးက နုတ်ထွက်ပေးလိုက်ရသည့် အင်ဒိုနီးရှားနိုင်ငံ သမ္မတ ဗိုလ်ချုပ်ကြီး ဆူဟာတို၏ မူဝါဒလမ်းစဉ်ကို လေးစားအားကျသူဖြစ်သည်ဟု သတင်းစာဆရာကြီးတဦးက မှတ်ချက်ပြုသည်။
“အင်ဒိုနီးရှားနိုင်ငံ ဖွဲ့စည်းပုံအခြေခံဥပဒေရဲ့ အမျိုးသားနိုင်ငံရေး ဦးဆောင်မှုအခန်းမှာ တပ်မတော် ပါဝင်ဖို့ ပြဋ္ဌာန်းခဲ့ပါတယ်။ အစိုးရ၀န်ကြီး (၃၂) ဦးမှာ (၁၀) ဦးကျော်ဟာ တပ်မတော်က ဖြစ်တယ်။ အမတ်ဦးရေ (၁,၀၀၀) ရှိတဲ့ ပြည်သူ့အတိုင်ပင်ခံလွှတ်တော်မှာ တပ်မတော်က (၂၀၀) ပါဝင်ခဲ့တယ်။ ပြည်နယ် (၂၇) ခုရဲ့ အုပ်ချုပ်ရေးမှူး ထက်ဝက်ကျော်ဟာ တပ်မတော်က ဖြစ်တယ်” ဟု စာတမ်းတစောင်တွင် ထွန်းအောင်ကျော် (MSR) ဆိုသူက ရေးသားခဲ့ကြောင်း အဆိုပါ သတင်းစာဆရာကြီးက ဆိုသည်။ ဆိုလိုသည်မှာ အထက်ပါ ထွန်းအောင်ကျော် (MSR) ဆိုသူသည် ယခု ခေတ်သစ်ပြည်သူ့ပါတီဥက္ကဋ္ဌ ဦးထွန်းအောင်ကျော် ဖြစ်နေသည့်အတွက် မြန်မာပြည်တွင် စစ်အုပ်ချုပ်ရေး တပတ်ပြန်လည်အောင် အသက်သွင်းမည့်သူဟု မဲဆန္ဒရှင် ပြည်သူတို့ကို စိတ်ထင့်စေသည်။
အမျိုးသားနိုင်ငံရေးအဖွဲ့ချုပ်
“အနာဂတ်အုပ်ချုပ်ရေးမှာ တပ်မတော်က ဆက်လက်ပါဝင်ခြင်းဟာ အာဏာကို လက်ဝါးကြီးအုပ်ဖို့ မဟုတ်ဘဲ အနာဂတ် အစိုးရသစ်ကို အားဖြည့်ကူညီမယ့် သဘောပါ” ဟု ဥက္ကဋ္ဌဖြစ်သူ ဦးအုန်းလွင်၏ နိုင်ငံရေးအယူအဆများကို ပြည်တွင်းထုတ် VENUS သတင်းဂျာနယ်တွင် ဖော်ပြခဲ့သည်။
အပြောင်းအလဲကို မျှော်လင့်နေသော ပြည်သူတို့နှင့် စစ်အုပ်ချုပ်ရေးကို အသက်သွင်းမည့် ဥက္ကဋ္ဌ ဦးအုန်းလွင် ဆိုသူ၏ အယူအဆ ကတ္တားခြားနေသည်ဟု နိုင်ငံရေးအကဲဖြတ်များက ဆိုကြသည်။ အထူးသဖြင့် ရွေးကောက်ပွဲဥပဒေ၊ နည်းဥပဒေ၊ မဲဆန္ဒနယ်သတ်မှတ်ခြင်းမှ အစ သေချာအကွက်ချပြီး မနိုင် နိုင်အောင် စီစဉ်ထားသော နအဖ၏ ရွေးကောက်ပွဲမဟာဗျူဟာ နည်းဗျူဟာတွင် အသုံးချခံ (သို့မဟုတ်) ခိုင်းစား၍ရမည့် တစ္ဆေတကောင်ဟု ဦးအုန်းလွင်ကို နိုင်ငံရေး အသိုင်းအ၀ိုင်းက သမုတ်ထားကြသည်။
ဒီမိုကရက်တစ်ပါတီ၏ ဘေးကျပ်နံကျပ် အနေအထား
ရွေးကောက်ပွဲ ကျင်းပပေးခြင်းသည် တပ်မတော်က စနစ်တကျ နောက်ဆုတ်ပေးခြင်းသာဖြစ်သည်။ တိုင်းပြည်၏ အချုပ်အခြာအာဏာကို တပ်မတော်က လုံးဝချုပ်ကိုင်ထားရာကနေ အရပ်သားတွေပါလာမယ့် စနစ်တခုကို ပြောင်းလဲပေးခြင်း ဖြစ်သည်ဟု ခံယူထားသူ ၎င်းပါတီအနေဖြင့် နအဖ၏ အဟန့်အတား ကန့်သတ်မှုများကို လက်တွေ့ရင်ဆိုင်နေရသည်။
အမတ်လောင်း (၁၀၀) ခန့် ရွေးချယ်ပြီးဖြစ်သော်လည်း တဦးလျှင် (၅) သိန်း ကော်မရှင်သို့ ပေးသွင်းရန် အခက်အခဲရှိနေသည်ဟု ဥက္ကဋ္ဌ ဦးသုဝေက ဆိုသည်။ ၎င်းပါတီဝင်တို့၏ ကိုယ်ရေးအကျဉ်းနှင့် ဓာတ်ပုံများကို နအဖကင်ပေတိုင် စအဖ (စစ်ဘက်ရေးရာ လုံခြုံရေးအဖွဲ့) မှ ခြိမ်းခြောက်တောင်းခံနေခြင်းကို ပါတီဝင်အင်အား တင်ပြနေစဉ် ရင်ဆိုင်ခဲ့ရသည်။
လွတ်လပ်၍ တရားမျှတသော ရွေးကောက်ပွဲ ဖြစ်ပေါ်လာရေးတွင် ယခုလို အကန့်အသတ်များကို ဖယ်ရှားပေးရန် ဩဂုတ် (၉) ရက်နေ့က ကော်မရှင်သို့ တိုင်ကြားစာ ပို့ထားသည်။ “ခုလို အသိပေးတာ ကျေးဇူးတင်ပါတယ်” ဟူသော စအဖအရာရှိတဦး၏ ချွေးသိပ်စကားမှလွဲ၍ ၎င်းပါတီမှာ မည်သည့်ရလဒ်ကောင်းမှ မရရှိခဲ့။
ပါတီများစွာ လှိုင်းပုတ်ပြီ
(ယခင်) ၀န်ကြီးချုပ်ဟောင်း ဦးနု၏ သမီး ဒေါ်သန်းသန်းနု (ဒီမိုကရက်တစ်ပါတီ-မြန်မာပြည်) က “အမတ်လောင်းတဦး တင်သွင်းရမှာက (၅) သိန်း။ ရွေးကောက်ပွဲစရိတ်၊ စည်းရုံးရေးစရိတ်တွေနဲ့ အမတ်လောင်းတဦး ခြိုးခြံသုံးရင်တောင် (၁၂) သိန်းခန့် ရင်းနှီးရမယ်။ ရွေးကောက်ပွဲကော်မရှင်ရဲ့ တင်းကျပ်တဲ့ အကန့်အသတ်တွေကိုတော့ သည်းခံနားလည်ပေးနိုင်ပါတယ်” ဟု ပြည်တွင်းမီဒီယာများကို ဖွင့်ချသည်။
မြန်မာဒီမိုကရေစီကွန်ဂရက်ပါတီ ဥက္ကဋ္ဌ ဦးကောင်းမြင့်ထွဋ်ကလည်း “ဩဂုတ် (၁၆) ရက်ကနေ နိုဝင်ဘာ (၇) ရက်နေ့အထိ ကာလသည် စစ်ရေးကာလဖြစ်နေပြီ။ ၂၀၁၀ မှာ ကမ္ဘာပျက်မယ်ဆိုတာ မဟုတ်ပါဘူး။ ၂၀၁၀ မှာ မြန်မာပြည် ပျက်သွားနိုင်ပါတယ်။ ဩဂုတ် (၁၈) ရက် နံနက် (၆) နာရီ ဗွီအိုအေမှာ ကျနော့်အင်တာဗျူး ထုတ်လွှင့်ပါလိမ့်မယ်။ ဒီအတွက် ဖမ်းချင်ဖမ်းပါလိမ့်မယ်။ ကျနော်ကလည်း အဖမ်းခံဖို့ အဆင်သင့်ပါ။ ရွေးကောက်ပွဲကော်မရှင်ရော၊ ကြံ့ဖွံ့လုပ်ပုံတွေ မဟုတ်တော့ဘူး။ ဒါကြောင့် ကျနော်တို့ ငြိမ်နေလို့ မရတော့ဘူး” ဟု ရင်ဖွင့်ခဲ့ဖူးသည်။
မတူကွဲပြားခြင်းနှင့် ငြိမ်းချမ်းရေးပါတီ ဥက္ကဋ္ဌ ဦးနေမျိုးဝေကမူ “ကျနော်တို့ပါတီကို ဟိုတယ်လိုနေရာမျိုးမှာ စည်းရုံးရေးအတွက် အခန်းမပေးကြဘူး။ စာနယ်ဇင်းတွေ့ဆုံပွဲ လွတ်လပ်စွာ လုပ်ခွင့်မရဘူး။ နေပြည်တော်အထိ လမ်းလျှောက်ချီတက်ပြီး လူထုစည်းရုံးရေးအသွင် လုပ်ဖို့ဆိုတာလည်း အိပ်မက်ဖြစ်သွားပြီ။ အချိန်၊ ငွေကြေး၊ အာဏာယန္တရား ပုံအောသုံးနေတဲ့ ကြံ့ဖွံ့ကို ကျနော်တို့ ဘယ်လိုမှ မကျော်နိုင်တော့ဘူး။ ဒါကြောင့် ပါတီရပ်တည်ခွင့် ရုပ်သိမ်းခြင်းမခံရအောင် မဲဆန္ဒနယ် (၃) ခုပဲ ၀င်ပြိုင်တော့မယ်” ဟု သတင်းထောက်တဦးသို့ ပြောသည်။
ပြည်ထောင်စုဒီမိုကရေစီပါတီ ဥက္ကဋ္ဌဟောင်း ဦးဖြိုးမင်းသိမ်းကမူ “၂၀၀၈ ဥပဒေအပေါ် ရွေးကောက်ပွဲကော်မရှင်ရဲ့ ဒီမိုကရေစီစံချိန်စံညွှန်း မကိုက်ညီတာတွေ တွေ့နေရတယ်။ ရွေးကောက်ပွဲဟာ တရားမျှတမှု မရှိဘူးဆိုတာ လက်တွေ့သိခဲ့ရပါပြီ။ ကြံ့ဖွံ့၊ တစညတွေကဲ့သို့ ဘယ်ပါတီမှ လုပ်ပိုင်ခွင့်မရပါဘူး။ ဒါကြောင့် ပါတီဥက္ကဋ္ဌနေရာကရော၊ ရွေးကောက်ပွဲအခင်းအကျင်းကရော နောက်ဆုတ်လိုက်တဲ့အကြောင်း ဩဂုတ် (၅) ရက်နေ့စွဲနဲ့ တရားဝင်ထုတ်ပြန်ခဲ့ပါတယ်” ဟု ဆိုခဲ့သည်။
အဆိုပါ သဘောထားထုတ်ပြန်ချက်အပေါ် NLD ပါတီ ဒု-ဥက္ကဋ္ဌ ဦးတင်ဦးမှ “ကိုဖြိုးမင်းသိမ်းနဲ့ ကျနော် ထောင်ထဲ အတူနေဖူးတယ်။ သူ့သဘောထား မှန်တယ်။ မတိမ်းဘူး။ မယိမ်းဘူး” ဟု သုံးသပ်ခဲ့သည်။
အပိုင်း (ဂ)
ရွေးကောက်ပွဲအခင်းအကျင်းမှ ကိုဖြိုးမင်းသိမ်း နုတ်ထွက်ပြီး မကြာမီ ၎င်းပါတီ၏ အရေးပါသူတဦးဖြစ်သည့် ဦးညိုထွန်းသည်လည်း ရွေးကောက်ပွဲတွင် ၎င်းအနေနှင့် ပါဝင်တော့မည်မဟုတ်ကြောင်း အတိအလင်း ကြေညာလိုက်သည်။
နအဖ၏ ကလိန်ကျ ချဉ်းကပ်မှုကို လက်တွေ့ရင်ဆိုင်လိုက်ရသော NDF ပါတီမှ ဒေါက်တာသန်းငြိမ်းကလည်း “ဂျာနယ်တစောင်နာမည်နဲ့ NDF ကို အင်တာဗျူးချင်တယ်ဆိုပြီး လူငယ်တဦး ပြောင်းရှည်ကင်မရာနဲ့ ရောက်လာတယ်။ သိလိုတာ မေးတယ်။ မှတ်တယ်။ ကျနော်က Journalist တွေကို လေးစားတယ်။ မခြွင်းမချန် ပြောတတ်တယ်။ သူ မေးမြန်းတာတွေကို ဖြေဆိုအပြီးမှာ သူက သတင်းတပ်ဖွဲ့ဝင် (SB) ကဖြစ်ကြောင်း ပြောတယ်။ ကျနော် အတော် စိတ်ကွက်ခဲ့ရတယ်။ ပါတီတခုရဲ့ မူဝါဒကို ခုလို ခိုးကြောင်ခိုးဝှက် ချဉ်းကပ်ယူတာ လူကြီးလူကောင်းအလုပ် မဟုတ်ဘူး” ဟု ၎င်း၏ အတွေ့အကြုံကို ပြည်တွင်းသတင်းထောက်တဦးအား ရှင်းပြခဲ့သည်။
တိုင်းရင်းသားပါတီတခု၏ မူဝါဒများကို 7 Days ဂျာနယ်သတင်းထောက်တဦးမှ တွေ့ဆုံမေးမြန်းနေစဉ် “ကျနော် စအဖ ကပါ” ဟု လူငယ်တဦးမှ ဗြောင်ကျကျ အနီးကပ်စောင့်ကြည့် သတင်းရယူနေသည့်အပေါ် လူ့ကျင့်ဝတ် ဖောက်ဖျက်ခြင်းဟု အဆိုပါ သတင်းထောက်က ဆိုသည်။
ရခိုင်တိုင်းရင်းသားများ တိုးတက်ရေးပါတီ (RNDP) ပါတီ ခေါင်းဆောင်များ၏ ဆွေမျိုးများအား စအဖ အပါအ၀င် လုံခြုံရေးတပ်ဖွဲ့ဝင်များက ခေါ်ယူစစ်ဆေးနေခြင်းကို တားမြစ်ပေးပါရန် ၎င်းပါတီက ရွေးကောက်ပွဲကော်မရှင်သို့ ဩဂုတ် (၂၀) ရက်နေ့က တိုင်ကြားခဲ့သည်ဟု သိရသည်။
ဦးခင်မောင်ဆွေ (NDF) လည်း ကျောခိုင်းပြီ
၁၉၉၀ ခုနှစ်က နိုင်ငံတော်ပုန်ကန်မှုဟု အမည်တပ် ပြစ်ဒဏ်ချမှတ်ခြင်း ခံခဲ့ရသည့် NDF ပါတီ CEC များဖြစ်ကြသော ဦးခင်မောင်ဆွေ၊ ဦးတင်အောင်အောင်၊ ဦးသာဆိုင်၊ ဦးစိန်လှဦးတို့အား ရွေးကောက်ပွဲဝင်လိုက အသနားခံစာ တင်ပြရန် ကော်မရှင်မှ တောင်းဆိုခဲ့သည်။
ပထမအကြိမ် အသနားခံစာ တင်ပြပြီးဖြစ်သော်လည်း ရွေးကောက်ပွဲကော်မရှင်က အကြောင်းပြန်ကြားခြင်း မရှိခဲ့။ ထပ်မံတင်ပြရန်သာ ညွှန်ကြားလာသဖြင့် ဦးခင်မောင်ဆွေမှ ပြစ်ဒဏ်ကျခံပြီးဖြစ်ကြောင်း၊ ထပ်မံ၍ အသနားခံစာ တင်ပြရန် မလိုကြောင်း၊ ထို့အတွက် ရွေးကောက်ပွဲသည် တရားမျှတမှုမရှိကြောင်း ဩဂုတ် (၂၄) ရက်နေ့တွင် ပြည်ပမီဒီယာများနှင့် တွေ့ဆုံစဉ် ပြောကြားခဲ့သည်။
ထို့နောက် ၂၀၁၀ ရွေးကောက်ပွဲတွင် ၎င်းပါဝင်တော့မည်မဟုတ်ကြောင်း ဩဂုတ် (၂၅) ရက်နေ့တွင် ဦးခင်မောင်ဆွေမှ နောင်တကြီးစွာရသူတဦးလို မီဒီယာများကို ပြောတော့သည်။
NLD၊ ဒေါ်အောင်ဆန်းစုကြည်နှင့် ဦးဉာဏ်ဝင်း
နေအိမ်အကျယ်ချုပ် ကျခံနေရသည့် NLD ခေါင်းဆောင် ဒေါ်အောင်ဆန်းစုကြည်နှင့် ရှေ့နေကြီး ဦးဉာဏ်ဝင်းတို့ ဩဂုတ် (၂၄) ရက်နေ့က ဒေါ်အောင်ဆန်းစုကြည်၏ နေအိမ်တွင် တွေ့ဆုံခွင့်ရခဲ့သည်။ ဩဂုတ် (၂၅) ရက်နေ့ နေ့လယ် (၂) နာရီခွဲ ရွှေဂုံတိုင်ရုံးချုပ်တွင် ကျင်းပသော သတင်းထောက်များနှင့် တွေ့ဆုံပွဲတွင် ဦးဉာဏ်ဝင်းက ရွေးကောက်ပွဲသည် တရားမျှတမှုမရှိဟု ဒေါ်အောင်ဆန်းစုကြည်မှ ပြောခဲ့ကြောင်း၊ NLD သည် ရွေးကောက်ပွဲမ၀င်သည့်အတွက် မည်သည့်ပါတီကို မဲပေးရမည်မသိ ဖြစ်နေသည်ဟူသော ပြည်သူတို့၏ အမေးအတွက် ပေးစရာလူမရှိရင် မပေးဘဲ နေလိုက်ရုံပဲ ရှိတယ်ဟု ဒေါ်အောင်ဆန်းစုကြည်မှ ဖြေကြားခဲ့ကြောင်း တဆင့်ခံပြောကြားခဲ့သည်။
အဆိုပါ တွေ့ဆုံပွဲတွင် ဒေါ်အောင်ဆန်းစုကြည်၏ အကျယ်ချုပ်သက်တမ်း လွတ်ရက်အား သတင်းထောက်တဦးမှ မေးမြန်းခဲ့ရာ ရွေးကောက်ပွဲ ကျင်းပအပြီး (၆) ရက်အကြာ နိုဝင်ဘာ (၁၃) ရက်နေ့မှာ လွတ်ရက်စေ့မည်ဟု ဦးဉာဏ်ဝင်းမှ ဖြေကြားခဲ့သည်။
စာစု၏ နိဂုံး
“လူတယောက်ရဲ့တန်ဖိုးဟာ သူဖြတ်သန်းကျော်လွှားနေတဲ့ ခေတ်ကြီးက သူ့ပခုံးပေါ် တင်ပေးလိုက်တဲ့ သမိုင်းပေးတာဝန်ကို သူ ဘယ်လောက် သယ်ပိုးထမ်းဆောင်ခဲ့တယ်ဆိုတဲ့ အချက်နဲ့ တိုင်းတာရမှာပဲ” ဟူသော စာသားကို ၎င်း၏အုတ်ဂူပေါ်တွင် ရေးထိုးစေရန် စာရေးဆရာ ဗန်းမော်တင်အောင်က ၎င်းမကွယ်လွန်မီကတည်းက မှာကြားခဲ့သည်။
ထို့ကြောင့် ယနေ့ ရွေးကောက်ပွဲဝင်မည့် ပါတီတို့အနေဖြင့် အောက်ပါအခြေအနေများကို ပြန်လည်စဉ်းစားသုံးသပ်ဖို့ အချိန်တန်နေပေပြီ။
- မဲလိမ်နေစရာမလိုအောင် အကွက်ချစီစဉ်ပြီးဖြစ်နေသော၊ ကြံ့ဖွံ့၏ တဖက်သတ်နိုင်ငံရေး အလဲထိုးပွဲမှန်း သိနေလျက် နိုင်ငံရေးအခင်းအကျင်းတွင် ပါဝင်လိုခြင်း၊
- ဩဇာပြိုင် ခိုင်းစား၍ရမည့် တစ္ဆေများကို အာဏာရှင်ပေါက်စ၊ အာဏာရှင်လောင်းများအဖြစ် မွေးထုတ်မည့် ၂၀၁၀ ရွေးကောက်ပွဲကို တိုင်းပြည်၏ အခြေအနေအရပ်ရပ်အား ပြောင်းလဲစေနိုင်မည်ဟု အမြင်လွဲမှားနေခြင်း၊
- လွှတ်တော်အတွင်း ဥပဒေပြုခွင့်၊ ဥပဒေပြောင်းလဲခွင့်၊ လုပ်ပိုင်ခွင့်၊ ဆွေးနွေးပိုင်ခွင့်များကို ဝေ့လည်ကြောင်ပတ် ဆောင်းအိပ်မက်ပမာ မြင်မက်နေခြင်း၊
- မုသားကတိက၀တ်များနှင့် လူထုကို မှိုင်းတိုက်နေသော နအဖ၏ လက်တွေ့မကျသည့် အိပ်မက်များကို ပြန်လည်ဆန်းစစ်ကာ နအဖလှည့်ကွက်တွင်းမှ လွတ်အောင်ရုန်းဖို့ (တနည်း) သမိုင်း၏ တရားခံတွေအဖြစ်ခံပြီး ရွေးကောက်ပွဲကို မျက်စိစုံမှိတ်လက်ခံခြင်းထက် နိုင်ငံရေးဂုဏ်သိက္ခာ ရယူကာ ရွေးကောက်ပွဲကို အမြန်စွန့်ခွာဖို့ အချိန်တန်နေပြီဟု ဆန္ဒပြုလိုက်ရပါသည်။
0 comments:
Post a Comment